បើចាប់អារម្មណ៍ចង់ឃើញផ្កាសាគូរ៉ាដ៏ស្រស់ស្អាត! កុំភ្លេច! ៦កន្លែងនេះណា!
- 2018-03-12 02:15:00
- ចំនួនមតិ 0 | ចំនួនចែករំលែក 0
បើចាប់អារម្មណ៍ចង់ឃើញផ្កាសាគូរ៉ាដ៏ស្រស់ស្អាត! កុំភ្លេច! ៦កន្លែងនេះណា!
ចន្លោះមិនឃើញ
បើនិយាយដល់ផ្កាសាគូរ៉ា ម្នាក់ៗគឺច្បាស់ជាគិតដល់ប្រទេសជប៉ុនភ្លាមតែម្តង ព្រោះថា ប្រទេសជប៉ុន គឺសម្បូរទៅដោយសួនផ្កាសាគូរ៉ាសឹងគ្រប់កន្លែងតែម្តង ហើយពេលដែលវារីកម្តងៗគឺថាស្រស់ស្អាតមែនទែន។ ជាក់ស្ដែង ដូចជាកន្លែងទាំង៦នេះអញ្ចឹង! គ្រាន់តែឃើញចាប់ភ្លាមចង់ទៅលេងហ្មង!
១. Chidorigafuchi ៖ ស្ថិតនៅទីក្រុងតូក្យូ ជាតំបន់មួយដែលមានដើមផ្កាសាគូរ៉ាជាច្រើនប្រភេទផ្សេងៗគ្នា ចំនួន២៦០ដើម ឯណោះ។នៅទីនោះលោកអ្នកអាចនឹងបានរីករាយជាមួយនឹងការជិះទូកកម្សាន្តបណ្ដើរ គយគន់ទេសភាពផ្កាសាគូរ៉ាដ៏ស្រស់ស្អាតបណ្ដើរ។ ពេលវេលាដ៏ល្អសម្រាប់គយគន់ផ្កាសាគូរ៉ាក្នុងតំបន់នេះគឺចាប់ពី ថ្ងៃទី៣១ មិនា រហូតដល់ ថ្ងៃទី៨ មេសា។
២. Kema Sakuranomiya Park ៖ ជាសួនមួយដែលមានដើមផ្កាសាគូរ៉ាចំនួន៤៨០០ដើម មានទីតាំងស្ថិតនៅទីក្រុងអូសាកា ជាប់នឹងមាត់ទន្លេ។ លោកអ្នកចង់ដើរមើលផ្កាក្នុងសួនផ្ទាល់ ឬក៏ជិះកប៉ាល់មើលពីចម្ងាយក៏បាន។ ឱកាសដ៏ល្អសម្រាប់គយគន់ផ្កាសាគូរ៉ាក្នុងសួននេះគឺចាប់ពី ថ្ងៃទី២ ដល់ថ្ងៃទី៤ មេសា។
៣. Fort Goryokaku ៖ នៅក្នុងតំបន់ហុកកៃដូ សាងសង់ឡើងជារាង ដូចផ្កាយ ម៉ូដលក្ខណៈបស្ចិមប្រទេស ក្នុងទីធ្លានៃតំបន់នោះមានដើមផ្កាសាគូរ៉ាចំនួន ១០០០ដើម។ ឱកាសដ៏ល្អសម្រាប់គយគន់ផ្កាសាគូរ៉ាក្នុងសួននេះគឺចាប់ពី ថ្ងៃទី៤ ដល់ថ្ងៃទី១១ ឧសភា។
៤. Suizenji Koen ៖ មានទីតាំងស្ថិតនៅតំបន់ Kumamoto មានដើមផ្កាសាគូរ៉ាតែ១៥០ដើម ប៉ុណ្ណោះ តែមានទេសភាពស្រស់ស្អាតត្រជាក់ភ្នែកមិនចាញ់កន្លែងដទៃទៀតដែរមានដើមផ្កាសាគូរ៉ាច្រើនឡើយ។ លោកអ្នកអាចសម្រាកលម្ហែ ជាមួយការញ៉ាំអាហារនៅលើវាលស្មៅ ពណ៌ បៃតងក្រោមដើមផ្កាសាគូរ៉ា រ៉ូមែនទិកអស់ទាស់។ ពេលវេលាដ៏ល្អសម្រាប់គយគន់ផ្កាសាគូរ៉ាក្នុងតំបន់នេះគឺចាប់ពី ថ្ងៃទី២៧ មិនា រហូតដល់ ថ្ងៃទី៤ មេសា។
៥. Kumamoto Castle ៖ ស្ថិតនៅក្នុងតំបន់ Kumamoto មានដើមផ្កាសាគូរ៉ាតែ១០០០ដើម។ លោកអ្នកអាចទស្សនាប្រាសាទបែបប្រពៃណីជប៉ុន និងសួនផ្កាសាគូរ៉ាបានទៀត។ ពេលវេលាដែលលោកអ្នកអាចទស្សនា សម្រស់នៃផ្កាសាគូរ៉ានេះបាន គឺចាប់ពី ថ្ងៃទី២៧ មិនា រហូតដល់ ថ្ងៃទី៤ មេសា។
៦. Uminonakmichi Seaside Park ៖ ទីតាំងដែលមានដើមផ្កាសាគូរ៉ាចំនួន ២០០០ដើម ស្ថិតនៅតំបន់ Fukuoka។ នៅទីនោះ លោកអ្នកមិនត្រឹមតែអាចទស្សនាផ្កាសាគូរ៉ាបានទេ លោកក៏អាចទស្សនាផ្កាផ្សេងទៀតបានផងដែរ។ ចាប់ពីថ្ងៃទី៣១ មិនា រហូតដល់ ថ្ងៃទី៨ មេសា ជាពេលវេលាពិសេសបំផុតក្នុងការគយគន់ទេសភាពដ៏ស្រស់បំព្រងនេះ។
ប្រភព៖ Travelog.com ប្រែសម្រួល៖ Khou Sophy