ថ្ងៃសែនទទួលទេវតា ហាមធ្វើរឿងទាំងនេះដាច់ខាត ប្រយ័ត្នគ្រួសារជួបតែរឿងស៊យ
- 2018-04-10 03:53:18
- ចំនួនមតិ 0 | ចំនួនចែករំលែក 0
ថ្ងៃសែនទទួលទេវតា ហាមធ្វើរឿងទាំងនេះដាច់ខាត ប្រយ័ត្នគ្រួសារជួបតែរឿងស៊យ
ចន្លោះមិនឃើញ
ក្នុងថ្ងៃមហាសង្ក្រាន្តមកដល់ក្នុងគ្រួសារនីមួយៗហាមដាច់ខាត មានអ្នកស្រក់ទឹកភ្នែក ឈ្លោះទាស់ទែងគ្នា មិនថាប្ដីប្រពន្ធ បងប្អូន តាយាយនោះទេ។ ជំនឿតាំងពីបុរាណមួយទៀតនោះ គឺហាមដាច់ខាតឲ្យបោកប្រាស់របស់ទ្រព្យចោលរហូតដល់បាក់បែកឡើយ មិនថាចាន ឆ្នាំង សំលៀកបំពាក់ ឬវត្ថុប្រើប្រាស់ផ្សេងៗ។ នេះបើតាមការលើកឡើងរបស់លោកតាអាចារ្យបុរាណខ្មែរ គង់ ណេរ រៀបរាប់មកកាន់ Sabay។
លោកតា បន្តថា ថ្ងៃមហាសង្ក្រាន្ត គឺជាថ្ងៃដ៏មានសិរីសួស្ដី សម្រាប់គ្រួសារនីមួយៗ ហើយត្រូវគ្រវាត់រឿងរ៉ាវស្មុគស្មាញចិត្តចោលឲ្យអស់។ ក្នុងនោះបើប្ដីប្រពន្ធ បងប្អូនប្រុសស្រី ធ្លាប់ឈ្លោះគ្នា ឬធ្លាប់ធ្វើខុសដាក់គ្នាពីមុនមក ត្រូវមកជានាគ្នាវិញ ហើយលើកលែងទោសឲ្យគ្នាទៅវិញទៅមក។ លោកតាអាចារ្យរូបនេះ ប្រាប់ថា បើថ្ងៃសិរីសួស្ដីក្លាយជាថ្ងៃក្ដៅក្រហាយវិញ នោះគ្រួសារនឹងជួបតែរឿងរកាំរកូសមិនចេះចប់មិនចេះហើយ។
ក្នុងថ្ងៃមហាសង្ក្រាន្តមកដល់ នៅវេលាម៉ោងដែលទេវតាចុះមក គ្រួសារនីមួយៗត្រូវជួបប្រជុំគ្នា ដើម្បីថ្វាយបង្គំព្រះនមស្សការព្រះរតនត្រ័យសមាទានសីល ហើយតាំងចិត្តឱ្យបានស្អាតបរិសុទ្ធ ជ្រះស្រឡះនូវមន្ទិលទាំងពួង ចិត្តរំពឹងគិតទៅលើព្រះពុទ្ធ ព្រះធម៌ព្រះសង្ឃជាទីពឹងទីរឭក លុះចប់ពិធីទទួលទេវតា ទើបទទួលបាននូវសេចក្ដីសុខ សុភមង្គល។ នេះបើតាមការបញ្ជាក់បន្ថែមពីលោកតា គង់ ណេរ។
ពិធីបុណ្យចូលឆ្នាំប្រពៃណីជាតិខ្មែរ នឹងចូលមកដល់នៅ ថ្ងៃសៅរ៍ ១៤រោច ខែចែត្រ ត្រូវនឹងទី ១៤ ខែមេសា ឆ្នាំ ២០១៨ វេលាម៉ោង ៩ និង ១២ នាទីព្រឹក។ ថ្ងៃសង្ក្រាន្តត្រូវនឹងថ្ងៃសៅរ៍ ទេពធីតា ដែលនឹងយាងចុះមកបន្តវេនរក្សាមនុស្សលោកក្នុងឆ្នាំនេះ គឺព្រះនាងមហោធរៈទេវី បុត្រីទី ៧ នៃកបិលមហាព្រហ្ម ទ្រង់អម្ពរពណ៌ខៀវ មានផ្កាត្រកៀត សៀតនៅព្រះកាណ៌ សោយសាច់ទ្រាយ (ជាសត្វព្រៃពពួកឈ្លូស តែតូចជាងឈ្លូស) ជាភក្សាហារ ព្រះហស្តស្តាំកាន់កងចក្រ ព្រះហស្តឆ្វេងកាន់ត្រីសូល៍ គង់លើមយូរ៉ា ឬស្ដេចក្ងោក ជាពាហនៈ៕
អត្ថបទ៖ វឌ្ឍនៈ
© រក្សាសិទ្ធិគ្រប់យ៉ាងដោយ Sabay ឆ្នាំ២០១៦
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
