ដើរលេងចូលឆ្នាំ ៥ កន្លែងនៅសៀមរាប ល្បីសប្បាយ ហើយទេសភាពស្អាតខ្លាំង

2018-04-11 06:50:07
ចំនួនមតិ 0 | ចំនួនចែករំលែក 0

ចន្លោះមិនឃើញ

សៀមរាប ជាទឹកដីមានសក្ដានុពលទេសចរណ៍ដ៏សម្បូរបែបបំផុតនៅកម្ពុជា រួមមានទាំងបែបវប្បធម៌ប្រវត្តិសាស្ត្រ និងតំបន់ទេសចរណ៍ធម្មជាតិជាច្រើន។ ភ្ញៀវទេសចរជាតិ និងអន្តរជាតិ ភាគច្រើនតែងសំដៅតំបន់អង្គរមុនគេ ពេលទៅដល់ទឹកដីដ៏អច្ឆរិយមួយនេះ។ ដោយឡែកថ្ងៃនេះ Sabay សូមនាំប្រិយមិត្តទៅស្គាល់៥កន្លែង ក្នុងចំណោមតំបន់ទេសចរណ៍ជាច្រើន ក្រៅពីតំបន់អង្គរនៅក្នុងខេត្តមួយនេះ៖

១. គយគន់ថ្ងៃលិចនៅភ្នំក្រោម

និយាយដល់រឿងគយគន់ថ្ងៃលិចនៅសៀមរាប គេប្រាកដជានឹកដល់ប្រាសាទបាខែងជាមិនខាន ព្រោះអីកន្លែងនេះមានមនុស្សទៅមើលច្រើនរាល់ថ្ងៃ មិនដែលអត់ម្ដងណាទេ។ ប៉ុន្តែកន្លែងមើលថ្ងៃលិចមួយទៀត ដែលកំពុងតែទាក់ទាញទាំងភ្ញៀវជាតិនិងអន្តរជាតិ ឱ្យទៅទស្សនា ត្បិតអីវាមិនសូវមានមនុស្សច្រើនដូចនៅបាខែង។ កន្លែងមួយនេះ គឺមានឈ្មោះថាប្រាសាទភ្នំក្រោម ដែលមានទីតាំងនៅទិសនិរតី ចម្ងាយ១២គីឡូម៉ែត្រពីទីក្រុងសៀមរាប។

អ្នកចង់ទៅទស្សនាអាចធ្វើដំណើរតាមផ្លូវស្របនឹងដងស្ទឹងសៀមរាបពីជើងទៅត្បូង ហើយភ្នំនេះស្ថិតនៅខាងជើងបឹងទន្លេសាប អាចឱ្យប្រិយមិត្តគយគន់ទេសភាពថ្ងៃលិច ឆ្លុះចាំងពីទន្លេបានយ៉ាងស្រស់ស្អាតទៀតផង។

២. អាហារដ្ឋានចម្ការត្រាវ

អាហារដ្ឋានចម្ការត្រាវ គឺជាកន្លែងសម្រាកលម្ហែកាយដ៏ល្អបំផុត សម្រាប់អ្នកចូលចិត្តទេសភាពបែបស្រុកស្រែ និងស្ងប់ស្ងាត់។ រមណីយដ្ឋានកែច្នៃបែបធម្មជាតិមួយនេះ កំពុងទាក់ទាញភ្ញៀវទេសចរជាតិ និងអន្តរជាតិជាច្រើនឲ្យទៅលេងកម្សាន្តនៅទីនោះ។ ក្រៅពីមានទេសភាពដ៏ស្រស់បំព្រង មានទាំងវាលស្រែ ស្រះទឹកធំៗដ៏ថ្លាឈ្វេងព្រមទាំងផ្កាឈូកកំពុងរីកក្រពុំ និងខ្យល់អាកាសដ៏បរិសុទ្ធ ជះក្លិនក្រអូបប្រហើរនៃក្លិនស្រូវ រុក្ខជាតិតូចធំហើយនោះ គឺម្ហូបអាហារគួរឲ្យចាប់អារម្មណ៍បំផុត។

ដូច្នេះប្រសិនបើចង់ភ្លក់រសជាតិម្ហូបខ្មែរគ្រប់មុខដ៏ឈ្ងុយឆ្ងាញ់ និងសម្រាកលម្ហែកាយក្រវាត់ចោលភាពស្មុគស្មាញទាំងឡាយអាចទៅទីនោះបាន ដោយស្ថិតនៅតាមផ្លូវជាតិលេខ៦ ក្នុងសង្កាត់ទឹកវិល ក្រុងសៀមរាប ខេត្តសៀមរាប។

បើបានទៅលេងសៀមរាប អង្គរសង្ក្រាន្ដឆ្នាំនេះ ហើយចង់ចំណាយតិចបំផុតលើការធ្វើដំណើរ អ្នកអាចជិះរ៉ឺម៉កកង់បី របស់ Grab (GrabRemorque) ដោយមានតម្លៃធូរជាងតម្លៃរ៉ឺម៉កកង់បីទូទៅ។ ស្រួលមិនស្រួល អ្នកអាចជិះអត់អស់លុយក៏ថាបាន ព្រោះ Grab កំពុងផ្ដល់ប្រូម៉ូសិនបញ្ចុះតម្លៃ ៨០០០ រៀល ដោយបញ្ចូលកូដ SIEMREAP ពេលហៅរ៉ឺម៉កកង់បីរបស់ Grab ជិះ។ កូដ SIEMREAP អាចប្រើបាន ២ ដងក្នុងមួយថ្ងៃ មានសុពលភាពចាប់ពីថ្ងៃទី ១ មេសា ដល់ ៣១ ឧសភា ២០១៨។

សម្រាប់អ្នកមិនទាន់មាន Grab app សូមចុចត្រង់នេះដើម្បីដោនឡូត។

៣. សារមន្ទីរជាតិអង្គរនៅក្រុងសៀមរាប

លោក សេង កុម្ភៈ ប្រធានផ្នែកថែរក្សាសមច្ច័យ(ថែរក្សា)នៃសារមន្ទីរជាតិអង្គរបានឲ្យដឹងថា សារមន្ទីរនេះបានសាងសង់ឡើងលើផ្ទៃដីប្រមាណ ២ម៉ឺនម៉ែត្រក្រឡា និងមានបែងចែកជា ៨វិចិត្រសាលធំៗ។ លោកបញ្ជាក់ថា សារមន្ទីរជាតិអង្គរជាកន្លែងផ្ដល់ចំណេះដឹងអំពីអរិយធម៌ខ្មែរដល់ភ្ញៀវទេសចរ មុននឹងអ្នកទាំងនោះទៅទស្សនាដល់ប្រាសាទផ្ទាល់។

បច្ចុប្បន្នសារមន្ទីរជាតិអង្គរមានដាក់តាំងបង្ហាញរូបបដិមា និងចម្លាក់នានាសរុបជាង ១៣០០រូប។ លោក សេង កុម្ភៈ ឲ្យដឹងថា បដិមាទាំងនេះត្រូវបាននាំយកមកពីអភិរក្សដ្ឋានអង្គរ និងសារមន្ទីរជាតិនៅរាជធានីភ្នំពេញ។

វិចិត្រសាលនីមួយៗរបស់សារមន្ទីរជាតិអង្គរត្រូវបានរៀបចំយ៉ាងមានរបៀបរៀបរយ ក្នុងនោះរួមមានវិចិត្រសាលឯកព្រះពុទ្ធបដិមា ១ពាន់អង្គ វិចិត្រសាលអរិយធម៌ខ្មែរ ជំនឿសាសនា វិចិត្រសាលទាក់ទងនឹងអង្គរវត្ត អង្គរធំ ព្រះមហាក្សត្រខ្មែរដ៏អស្ចារ្យ សិលាចារិក និងសម្លៀកបំពាក់សម័យបុរាណខ្មែរជាដើម។

ចំពោះតម្លៃសំបុត្រចូល ទស្សនាវិញគឺមានតម្លៃបីដុល្លារសម្រាប់ភ្ញៀវជាតិ និង១២ដុល្លារសម្រាប់ភ្ញៀវបរទេស។ ក្នុងមួយថ្ងៃមន្ត្រីរបស់សារមន្ទីរថាមានអ្នកចូលទស្សនាប្រហែលជា៤០០នាក់ក្នុងនោះមានជនជាតិ ចិន ជប៉ុន និងកូរ៉េ ជាដើម។

៤. ពើងតានន់

ផ្ទាំងសិលាធំៗ ជាច្រើនបង្គរបណ្ដាក់លើគ្នាជាច្រើនរាប់មិនអស់ រួមនឹងទេសភាពដ៏ស្រស់ត្រកាលប្រៀបដូចសម្រស់ក្រមុំព្រហ្មចារី អមដោយ រុក្ខជាតិខៀវខ្ចី កំពុងរីកលូតលាស់ បញ្ចេញសម្រស់ផ្កាធម្មជាតិ និង ខ្យល់អាកាសបរិសុទ្ធ ធ្វើឱ្យពើងតានន់ ដែលមិនសូវមានអ្នកស្គាល់ ប្រៀបដូចឋានសួគ៌លើដីអ៊ីចឹង។

តំបន់ទេសចរដ៏ប្រណិតនេះ មានទីតាំង ស្ថិតនៅ ភូមិ គោកដូង ស្រុកអង្គរជុំ ខេត្តសៀមរាប ចម្ងាយប្រមាណតែ ៨៥គីឡូម៉ែត្រប៉ុណ្ណោះពីទីរួមខេត្តសៀមរាប។ កាលពីមុនទីតាំងខាងលើពិបាកធ្វើដំណើរដោយសារផ្លូវធ្វើមិនទាន់រួច ប៉ុន្តែបច្ចុប្បន្នការធ្វើដំណើរមានភាពងាយស្រួល មិនពិបាកទៀតទេ។

ក្រៅពីមានដំថ្មជាច្រើនត្រួតលើគ្នាជាច្រើនហើយខ្ពស់ បញ្ចេញរូបរាងដូចនឹងប្រាសាទបុរាណហើយនោះ នៅទីនោះមានអាស្រមរបស់ព្រះសង្ឃដែលគង់នៅលើភ្នំ មើលថែរក្សាកន្លែងដ៏ស្ងប់ស្ងាត់នោះទៀតផង។

៥. រមណីយដ្ឋានភូមិលិចទឹកកំពង់ភ្លុក

កំពង់ភ្លុកជារមណីយដ្ឋានធម្មជាតិដ៏ល្បីល្បាញលើទឹកដីខេត្តសៀមរាប កើតចេញពី៣ភូមិបណ្ដែតលើទឹករួមគ្នា។ តំបន់ទេសចរណ៍ដ៏កម្រនេះ មានចម្ងាយប្រមាណ១៦គីឡូម៉ែត្រពីទីរួមខេត្ត និងហ៊ុមព័ទ្ធដោយព្រៃលិចទឹកជាច្រើនប្រភេទ ហើយក៏ជាតំបន់អភិរក្សសត្វស្លាបសំខាន់មួយ ក្នុងប្រទេសកម្ពុជា។

តាមប្រភពពីក្រសួងទេសចរណ៍បានឲ្យដឹងថា ភូមិបណ្ដែតទឹកកំពង់ភ្លុក មានប្រជាជនរស់នៅប្រមាណជាង ៣០០០ នាក់។ ទៅលេងកម្សាន្តនៅទីនោះ ភ្ញៀវទេសរនឹងលង់ជាមួយសម្រស់ធម្មជាតិដ៏ត្រកាល អាចទស្សនាសត្វស្លាបរហូតទៅដល់ជាង១០០ប្រភេទ រួមទាំងត្រីចម្រុះហែលឆ្វាត់ឆ្វែងគួរជាទីទស្សនា៕