បទពិសោធន៍ដែលខ្ញុំទទួលពីដំណើរកម្សាន្តនៅលើកោះ រ៉ុងសន្លឹមជាលើកដំបូង...!

2017-11-09 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការដើរលេងបានផ្ដល់បទពិសោធន៍ជាច្រើនដល់ខ្លួនខ្ញុំផ្ទាល់។ នៅក្នុងឱកាសបុណ្យអុំទូក ខ្ញុំនិងគ្រួសារខ្ញុំបានទៅលេងកោះមួយដែលមានប្រជាប្រិយភាពខ្លាំងនៅខេត្តព្រះសីហនុដែលហៅថាកោះរ៉ុងសន្លឹម(Koh Rong Sonloem) ហើយវាក៏ជាលើកដំបូងផងដែរ។ ដោយសារតែវាជាលើកដំបូងនឹងហើយដែលនាំឱ្យគ្រួសាររបស់ខ្ញុំត្រៀមរបស់របរយ៉ាងច្រើនស្ទើរអស់ពីផ្ទះតែម្ដង។ ខ្ញុំនឹងរៀបរាប់ពីបទពិសោធន៍ដ៏រីករាយនិងគួរឱ្យចង់សើចមួយនេះដល់មិត្តអ្នកអាន។

កុំរៀបចំហួសហេតុពេក!

គ្រួសារខ្ញុំបានរៀបចំឥវ៉ែឥវ៉ាន់តាំងពីម៉ោង៣ទាបភ្លឺដើម្បីទៅដើរលេង។ ដោយសារតែបានលឺថានៅកោះនោះគ្មានអីញ៉ាំទេអញ្ចឹងពួកយើងបានត្រៀមរបស់របរចាន ឆ្នាំង ស្លាបព្រា ចង្ក្រាន និងធុងទឹកកកទុកសម្រាប់ចម្អិនអាហារដោយខ្លួនឯង។ ពេលទៅដល់ខេត្តព្រះសីហនុពួកយើងបានទិញគ្រឿងសមុទ្រយកទៅញ៉ាំនៅលើកោះនោះ។ ហើយយើងក៏បន្តដំណើរទៅកាន់ផែដើម្បីជិះកប៉ាល់ទៅកាន់កោះ។ តែមុននឹងបានឡើងកប៉ាល់គឺពិតជាមានភាពត្រដាបត្រដួសមែនទែនដោយសារតែអីវ៉ាន់ដែលជញ្ជូនមានច្រើនហើយធ្ងន់និងត្រូវដើរឆ្ងាយ។ មិនត្រឹមតែចានឆ្នាំងទេ, គ្រួសារខ្ញុំបានជញ្ជូនតង់ ខ្នើយនិងភួយទៀតបូករួមនឹងកាបូបដាក់សំលៀកបំពាក់ម្នាក់មួយៗទៀត។

នៅពេលកប៉ាល់មកដល់ផែយើងត្រូវជញ្ជូនរបស់ទាំងនោះឡើងលើកប៉ាល់។មានមនុស្សជាច្រើនរួមដំណើរតាមកប៉ាល់ហើយម្នាក់ៗក៏មិនខុសពីគ្រួសារខ្ញុំប៉ុន្មានដែរ។ អ្នកខ្លះត្រូវជួលរទេះជញ្ជូនអីវ៉ាន់ទៀតផង។

ទីបំផុតយើងក៏បានទៅដល់កោះនៅម៉ោង៦:៣០ល្ងាច។ ពួកយើងបានកក់ផ្ទះសម្រាប់ស្នាក់នៅមួយចម្ងាយប្រហែល១គីឡូកន្លះពីផែនៃកោះ។ ម្នាក់ៗទាំងអស់កម្លាំងទាំងឃ្លានហើយត្រូវដើរលើឆ្នេរខ្សាច់ដ៏ឆ្ងាយដោយមានអីវ៉ាន់សំពីងសំពោងស្ពាយផងយួរផងទូលផង។ Zzzz

តាមពិតទៅនៅទីនោះមិនមែនគ្មានអីញ៉ាំសោះនោះទេតែថ្លៃ។ ជាពិសេសមានភោជនីយដ្ឋាន bar ដែលមានអាហារឆ្ងាញ់ៗនិងស្រាក្រឡុកឆ្ងាញ់ៗផងដែរ។

កុំខ្លាចវង្វេង!

អ្នកដែលបានស្គាល់ខ្ញុំភាគច្រើនដឹងថាគ្មានអ្នកណាដែលអត់ប្រយោជន៍ជាងខ្ញុំទេពេលនិយាយដល់រឿងផ្លូវ។ ខ្ញុំមិនសូវពូកែស្គាល់ផ្លូវទេតែពេលទៅដល់កន្លែងណាថ្មីប្លែកខ្ញុំមិនខ្លាចនឹងវង្វេងទេព្រោះខ្ញុំគិតថាឱកាសបានដើរលេងកន្លែងល្អៗប្លែកៗកម្រមានដូចនេះខ្ញុំចង់ដើរឱ្យបានសព្វដើម្បីឱ្យដឹងថាមានអ្វីខ្លះ។ (Think outside the box and go out of your comfort zone!)

កុំខ្វល់ពីអ្វីដែលយើងមិនអាចផ្លាស់ប្ដូរបាន

គ្រួសារខ្ញុំបានកក់ផ្ទះសម្រាប់គេងតែរយៈពេលមួយយប់ប៉ុណ្ណោះដោយមានគម្រោងស្នាក់នៅតែមួយយប់។ តែដោយសារតែពេលមកដល់កោះយប់ពេកទៅហើយមិនបានកម្សាន្តអស់ចិត្តពួកយើងក៏សម្រេចចិត្តស្នាក់នៅមួយយប់ទៀត។ ប៉ុន្តែបញ្ហានោះគឺម្ចាស់ផ្ទះអនុញ្ញាតឱ្យពួកយើងស្នាក់នៅតែមួយយប់តាមការកក់ទុកប៉ុណ្ណោះព្រោះមានអ្នកកក់ផ្សេងទៀតដែរ។

ប៉ុណ្ណឹងមិនជាបញ្ហាទេ, ពួកយើងបានស្វែងរកផ្ទះថ្មីសម្រាប់គេងមួយយប់ទៀត។ តែកន្លែងថ្មីនោះមិនមានភាពស្ងប់ស្ងាត់និងមានឆ្នេរខ្សាច់ស្អាតដូចកន្លែងចាស់ទេ។ តែយើងក៏នៅតែមានរឿងកម្សាន្តដ៏ទៃទៀតនិងអាហារឆ្ងាញ់ៗញ៉ាំដែរ។

រាត្រីចុងក្រោយនៅលើកោះរ៉ុងសន្លឹម, គ្រួសារខ្ញុំនិងខ្ញុំបានដើរតាមឆ្នេរសមុទ្រទៅញ៉ាំ Cocktai នៅហាងមួយដែលមានឈ្មោះថា The One។ ដែលមានស្រាក្រឡុកច្រើនប្រភេទនិងអាហារបែបអឺរ៉ុបឆ្ងាញ់ ៗមិនខុសពីនៅទីក្រុងទេ។