កាល​ពី​មុន​គេ​មិន​សូវ​ទទួល​ស្គាល់​ស្នាដៃ​បទ​ចម្រៀង​ដែល​និពន្ធ​ថ្មី​របស់​ខ្មែរ​ទេ​ ប៉ុន្តែ​គួរ​ឲ្យ​ស្ងើច​សរសើរ​ណាស់​ដល់​ក្មេង​ៗ​ជំនាន់​ក្រោយ​ដែល​នៅ​តែ​ខិត​ខំ​ប្រឹង​ប្រែង​បង្កើត​នូវ​អ្វី​ដែល​ថ្មី ​និង​ជា​របស់​ខ្មែរ​ហើយ​នាំ​គ្នា​លើក​ទឹក​ចិត្ត​ជួយ​គាំ​ទ្រ​គ្នា​ឯង​យ៉ាង​ពេញ​ទំហឹង​។ Sabay ក៏​ចង់​ចូល​រួម​ចំណែក​គាំ​ទ្រ​ដល់​ស្នាដៃ​ថ្មី​ៗ​ក្នុង​ការ​និពន្ធ​ចម្រៀង​របស់​កូន​ខ្មែរ​ដែរ​ ដូច្នេះ​ក៏​បាន​ជួប​សម្ភាស​ជាមួយ​កំលោះ​សង្ហា​ម្នាក់​ដែល​បាន​និពន្ធ​បទ​ចម្រៀង​ថ្មី​ជា​របស់​ខ្មែរ​តែ​មាន​លាយ​ឡំ​ជា​ចង្វាក់​ R&B បន្តិច​ដែល​ធ្វើ​ឲ្យ​អ្នក​ស្ដាប់​ទទួល​បាន​អារម្មណ៍​ថ្មី​មួយ​បែប​ទៀត ក្នុងលក្ខណៈខុសពីអ្នកដទៃ។  ចង់​ស្គាល់​គាត់​ជា​អ្នក​ណា?

អូន ជា​ឈ្មោះ​ដែល​គេ​បាន​ស្គាល់​តាម​រយៈ​វីដេអូ​ចម្រៀង​​កំពុង​ពេញ​និយម​ក្នុង​ស្រទាប់​យុវវ័យ​នោះ​គឺ​បទ​ «​រៀប​ការ​នឹង​បង​បាន​ទេ​» ​។​ ដោយ​សារ​ស្រលាញ់​សិល្បៈ​ចម្រៀង​ខ្លាំង​ពេក​ ​ពេល​រៀន​ចប់​នៅ​វិទ្យាល័យ​  លោក អូន បាន​សុំ​ប៉ា​ម៉ាក់​​ទៅ​រៀន​បន្ត​នៅ​សាលា​វិចិត្រ​សិល្បៈ​តែ​ត្រូវ​ប៉ា​ម៉ាក់​បដិសេធ​ រួច​ហើយ​ក៏​សម្រេច​ចិត្ត​មិន​បន្ត​ការ​សិក្សា​ដល់​សព្វ​ថ្ងៃ​នេះ​។ ​ប៉ុន្តែ​ផ្ទុយ​ទៅ​វិញ​យុវជនរូបនេះ ​មិន​បោះ​បង់​ការ​ស្រលាញ់​ក្នុង​សិល្បៈ​ចោល​ដាច់​ខាត​ រហូត​បាន​ហាត់​រៀន​ច្រៀង​ Rap​ និង​ក្លាយ​ជា​តារា​ចម្រៀង​​នៅ​ក្នុង​ផលិតកម្ម​ Kalp Ya Handz ក៏​ដូច​ជា​អ្នក​និពន្ធ តួ​សម្ដែង និង​អ្នក​រាំ​ផង​ដែរ​។ មក​ទល់​សព្វ​ថ្ងៃ​បទ​ចម្រៀង​ដែល​គាត់​បាន​និពន្ធ​សម្រាប់​ខ្សែ​ភាព​យន្ត «​ប៉ុបពី​ទៅ​ហូលីវូដ»​ ធ្វើ​ឲ្យ​កក្រើក​ដល់​អ្នក​ស្ដាប់​ជា​ច្រើន​តែង​តែ​ស្ដាប់​គ្រប់​ពេល​វេលា និង​នាំ​គ្នា​ Share ពេញ​បណ្ដាញ​ផ្សព្វ​ផ្សាយ​សង្គម​ច្រើន​ហួស​គួរ​ឲ្យ​កត់​សម្គាល់​។

​​​ជា​ចុង​ក្រោយ ម្ចាស់បទ«​រៀប​ការ​នឹង​បង​បាន​ទេ​» រូបនេះ ចង់​ផ្កាំ​ផ្ញើ​ដល់​អ្នក​ដែល​ស្រលាញ់​សិល្បៈ​ទាំង​អស់​គ្នា​ឲ្យ​ក្រោក​ឈរ​ឡើង​ចូលរួម​ច្នៃ​ប្រឌិត​សិល្បៈ​ចម្រៀង​ខ្មែរ​ឲ្យ​លេច​មុខ​លេច​មាត់​ក្នុង​ឆាក​អន្តរជាតិ​សារ​ឡើង​វិញ  ​ព្រោះ​យើង​ធ្លាប់មាន​សិល្បៈ​វប្បធម៌​ដ៏​ល្បីល្បាញ​ស្រាប់​ត​ពី​បុព្វបុរស​យើង​ នៅ​ខ្វះ​តែ​ការ​ខិត​ខំ​រក្សា​និង​អភិវឌ្ឍ​សិល្បៈ​ទាំង​នោះ​ឲ្យ​រស់​រវើក​តែ​ប៉ុណ្ណោះ​។

រូបភាព៖​ Pu Sam

អត្ថបទ៖ និតា