បើប្រលងបាក់ឌុបធ្លាក់ត្រូវដោះស្រាយដូចម្តេច?
- 2016-09-09 10:47:55
- ចំនួនមតិ 0 | ចំនួនចែករំលែក 0
បើប្រលងបាក់ឌុបធ្លាក់ត្រូវដោះស្រាយដូចម្តេច?
ចន្លោះមិនឃើញ
ជាការពិតណាស់ការប្រលងបាក់ឌុប (មធ្យមសិក្សាទុតិយភូមិ) គឺជារឿងរ៉ាវស្លាប់រស់របស់សិស្សគ្រប់ៗគ្នា ប៉ុន្តែពេលខ្លះរឿងអកុសលអាចកើតមានឡើងមិនចំពោះតែសិស្សដែលធ្វេសប្រហែលនោះទេ តែក៏វាអាចកើតឡើងចំពោះសិស្សដែលខំប្រឹងរៀនផងដែរ។ ដូច្នេះប្រសិនបើអ្នក កូនៗ មិត្តភក្តិ ឬបងប្អូនរបស់អ្នកជួបបញ្ហានេះ តើអ្នកគួរធ្វើបែបណាដើម្បីជៀសវាងការបាក់ទឹកចិត្តធ្ងន់ធ្ងរ?
១. កុំស្លន់ស្លោ៖ វាមិនមែនជារឿងងាយស្រួលនោះទេ នៅពេលដែលឮដំណឹងថាអ្នកប្រលងធ្លាក់បាក់ឌុប តែត្រូវចងចាំថាយើងនៅមានឱកាសច្រើនទៀត ហើយមានមនុស្សជាច្រើនដែលឆ្លងកាត់ដំណាក់កាលនេះមុននឹងប្រលងជាប់។ ត្រូវគិតថាអ្នកនៅមានឱកាសជាច្រើនទៀត និងអាចស្វែងរកវិធីសាស្ត្រដើម្បីប្រលងជាប់។
២. និយាយពីអារម្មណ៍៖ អ្នកមិនគួរលាក់ទុកក្នុងចិត្តនោះទេ វាចាំបាច់ដែលអ្នកត្រូវនិយាយពីអារម្មណ៍របស់អ្នកប្រាប់គ្រួសារ មិត្តជិតស្និត ឬអ្នកដែលយល់ពីចិត្ត និងអ្នកដែលអាចផ្តល់ដំបូន្មានដល់អ្នក។ សូមចងចាំថាការប្រលងធ្លាក់មិនមែនជាទីបញ្ចប់នៃពិភពលោកនោះទេ។ អ្នកអាចយកវាជាបទពិសោធន៍ដើម្បីជំនះឧបសគ្គនាពេលអនាគត។ មានមនុស្សជោគជ័យជាច្រើនដែលធ្លាប់ឆ្លងកាត់ការបរាជ័យ និងការឈឺចាប់រាប់មិនអស់។
៣. ទទួលយកការណែនាំ៖ ទទួលយកការណែនាំផ្នែកអនុវត្ត និងដំបូន្មានល្អៗពីគ្រូបំប៉នដើម្បីទទួលបានភាពជោគជ័យនៅពេលប្រលងលើកក្រោយ។ គ្រូបំប៉ន ឬមិត្តភក្តិដែលរៀនពូកែអាចនឹងធ្លាប់ជួបបញ្ហាដូចអ្នក ហើយក៏អាចធ្លាប់ផ្តល់ដំបូន្មានប្រភេទនេះដល់សិស្សជាច្រើន ដូច្នេះគាត់យល់អារម្មណ៍របស់អ្នក។ ត្រូវពិភាក្សាជាមួយគ្រូបំប៉នពីរបៀបសិក្សាថាតើអ្នកមានអ្វីគ្រប់គ្រាន់ដើម្បីត្រៀមប្រលងឬនៅ? តើអ្នកសិក្សាបានគ្រប់គ្រាន់ដើម្បីត្រៀមប្រលងឬនៅ? តើមានចំណុចណាខ្លះដែលគួរកែលម្អ? តើសិស្សពូកែមានវិធីសាស្ត្រសិក្សាបែបណា?
៤. កំណត់គោលដៅដើម្បីទទួលជោគជ័យ៖ បន្ទាប់ពីអ្នកទទួលបានចម្លើយខាងលើហើយត្រូវត្រៀមអនុវត្ត។ រៀបចំគម្រោងឲ្យបានច្បាស់ ថាតើត្រូវធ្វើដូចម្តេចដើម្បីត្រៀមប្រលង និងចាត់ចែងពេលឲ្យមានប្រសិទ្ធភាព ឬត្រូវរំលឹកមេរៀនជាមុនយ៉ាងដូចម្តេច។
៥. កុំតឹងតែងចំពោះខ្លួនឯងពេក៖ ការប្រលងបាក់ឌុបមានការលំបាក សិស្សខ្លះត្រៀមខ្លួនជាមុនបីឆ្នាំ ហើយរៀនត្រៀមប្រលងរហូតដល់ម៉ោង ២ ឬ ៣ យប់ដើម្បីបាននិទេស្ទល្អ។ ជួនកាលលទ្ធផលចេញមកមិនដូចការគិតរបស់យើងទេ ដូច្នេះត្រូវតែរៀនទទួលយកលទ្ធផល និងការពិត។ ត្រូវចេះបន្ធូរអារម្មណ៍ និងបន្តដំណើរទៅមុខទៀតតាមលទ្ធភាពដែលអ្នកអាចធ្វើបាន។
អត្ថបទ៖ Sam