សាកបានដឹង កម្មវិធី Sabay E-Novel ធានាអានជក់រហូតអស់ថ្មទូរសព្ទ

2017-02-28 01:04:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយរឿងប្រលោមលោកអនឡាញទទួលការគាំទ្រខ្លាំងតាំងពីឆ្នាំ ២០១២ ក្រុមហ៊ុន Sabay បានសម្រេចដាក់ឲ្យប្រើកម្មវិធីទូរសព្ទ E-Novel ផ្លូវការ ដោយប្រមូលផ្តុំសុទ្ធតែរឿងប្រលោមលោកល្បីៗ កាន់តែងាយស្រួលសម្រាប់អ្នកអាន។

លោក ជី សិលា នាយកក្រុមហ៊ុន Sabay បានឲ្យដឹងថា ការដាក់ឲ្យប្រើកម្មវិធីទូរសព្ទប្រមូលផ្តុំសុទ្ធតែរឿងប្រលោមលោកល្បីៗ ដំបូងគេនេះ គឺដើម្បីជួយលើកស្ទួយដល់ស្នាដៃនិពន្ធរបស់កវីល្បីៗ។ ថែមលើនេះ Sabay E-Novel ក៏នឹងក្លាយជាចំណែកមួយ ជួយអភិរក្សនិងលើកស្ទួយអក្សរសិល្ប៍ខ្មែរផងដែរ។

លោកបន្តទៀត ថា កម្មវិធីទូរសព្ទ Sabay E-Novel មិនត្រឹមតែក្លាយជាវេទិកាមួយ ជំរុញឲ្យអ្នកនិពន្ធទាំងឡាយចាប់ផ្ដើមមានទឹកចិត្តបង្កើតស្នាដៃឡើងវិញនោះទេ ថែមទាំងជំរុញឲ្យយុវវ័យកម្ពុជាមានទម្លាប់អានកាន់តែប្រសើរឡើង។ មួយវិញទៀតវាក៏ជួយឲ្យកវីនិពន្ធនិងអ្នកអានកាន់តែខិតជិតគ្នា ហើយភាគីទាំងសងខាងនឹងអាចទាញប្រយោជន៍ពីគ្នាទៅវិញទៅមក។

នាយកក្រុមហ៊ុនរូបនេះ បន្ថែមថា ដោយសារការរីកចម្រើនលើផ្នែកភាពយន្តដែលត្រូវការសាច់រឿងល្អៗ Sabay បានសហការផលិតរឿងប្រលោមលោក មនោសញ្ចេតនាល្បីៗ ក្នុងនោះរឿងស្រទន់មន្តស្នេហ៍ និង មន្តស្នេហ៍លេខា ដែលជាប្រលោមលោកទទួលការគាំទ្រខ្លាំងពីមិត្តអ្នកអាន ត្រូវយកទៅជាផលិតជាភាពយន្តភាគទូរទស្សន៍ ហើយត្រៀមចាក់បញ្ចាំងក្នុងឆ្នាំ ២០១៧ នេះ។

Sabay E-Novel ជាកម្មវិធីទូរសព្ទប្រមូលផ្តុំដោយរឿងប្រលោមលោកល្អៗរាប់រយរឿង រួមមានរឿងប្រភេទ មនោសញ្ចេតនា គុននិយម ព្រឺព្រួច អាថ៌កំបាំង ស៊ើបអង្កេត និងរឿងព្រេងល្បីៗមានទាំងខ្មែរនិងបរទេស។ ក្រៅពីសាច់រឿងជាសំណេរ ក៏មានរឿងប្រលោមលោកជាសំឡេង និងល្ខោនវិទ្យុ ល្អៗជាច្រើនទៀតផងដែរ។

បច្ចុប្បន្នប្រិយមិត្តអាចទាញយកកម្មវិធី Sabay E-Novel លើប្រព័ន្ធប្រតិបត្តិការ Android តែសម្រាប់ iOS នឹងមានក្នុងពេលឆាប់នេះ៕

អត្ថបទ៖ ផាន់និត