គន្លឹះក្នុងការតស៊ូមតិអោយបានល្អ ពីក្រុមជយលាភីផ្នែកតស៊ូមតិឆ្នើមឆ្នាំ២០១៧

2017-04-07 07:56:39
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់ឆ្នាំ២០១៧នេះ ក្រុមដែលទទួលបានជ័យលាភីលេខមួយផ្នែកតស៊ូមតិឆ្នើមប្រចាំឆ្នាំ២០១៧ របស់ JCI Cambodia គឺជាក្រុមនិស្សិតមកពីសកលវិទ្យាល័យនីតិសាស្ត្រ និង វិទ្យាសាស្ត្រសេដ្ឋកិច្ច (RULE) ជំនាញផ្នែកច្បាប់ភាសាអង់គ្លេស។

សមាជិកទាំងបីរូបក្នុងក្រុមនេះមានដូចជាលោក ស៊ន់ វណ្ណៈ កញ្ញា នៅ សុនិកា និង កញ្ញា សុំ សាន្តសុគន្ធកក្កដា។ ដោយសារតែសមាជិកក្នុងក្រុមបានត្រៀមខ្លួនយ៉ាងល្អ និង ធ្លាប់ឆ្លងកាត់បទពិសោធន៍ក្នុងការតស៊ូមតិមួយចំនួនផង ទើបជំរុញអោយអ្នកទាំងបីអាចដណ្ដើមបានជ័យលាភីលេខមួយក្នុងការប្រកួតប្រជែងតស៊ូមតិឆ្នាំ២០១៧ នេះបាន។

ក្នុងកិច្ចសម្ភាសន៍មួយជាមួយនឹងក្រុមការងារ Sabay អ្នកទាំងបីបានសំដែងនូវអារម្មណ៍សប្បាយរីករាយ ព្រមទាំងបានចែករំលែកនូវគន្លឹះសំខាន់ៗមួយចំនួន ក្នុងការតស៊ូមតិអោយបានល្អសម្រាប់ការប្រកួតប្រជែងនានាផងដែរ។ គន្លឹះទាំងអស់នោះគឺមាននៅក្នុងវីដេអូខាងក្រោម៖

ជាចុងក្រោយ កញ្ញា សុំ សាន្តសុគន្ធកក្កដាដែលតំណាងអោយក្រុម បានលើកឡើងថា ក្រុមរបស់កញ្ញាផ្ទាល់ក៏នៅមានចំណុចខ្វះខាតមួយចំនួនផងដែរ ដែលត្រូវការអភិវឌ្ឍ និង ហ្វឹកហាត់បន្ថែមទៀត មុននឹងឈានទៅប្រកួតជាលក្ខណៈអន្តរជាតិ។ ព្រោះថា តាមរយៈការសង្កេតលើការប្រកួតប្រជែងឆ្នាំមុនៗ បេក្ខជនអន្តរជាតិដែលបានចូលរួមប្រកួតគឺភាគច្រើនមានវ័យចំណាស់ជាង។ ម៉្លោះហើយ ពួកគាត់មានចំណេះដឹងទូលំទូលាយ និង ស៊ីជម្រៅ។ ជាពិសេសគឺមានបទពិសោធន៍ផ្ទាល់ក្នុងការងារតែម្ដង។ ប៉ុន្តែទោះជាយ៉ាងនេះក្ដី ក៏ក្រុមរបស់កញ្ញាប្ដេជ្ញានឹងប្រឹងប្រែងអោយអស់ពីសមត្ថភាព សម្រាប់ការប្រកួតប្រជែងបន្តនាពេលខាងមុខផងដែរ។

សូមបញ្ជាក់ផងដែរថា ចំពោះក្រុមតស៊ូមតិដែលបានឈ្នះនេះ នឹងត្រូវទទួលបានការបណ្ដុះបណ្ដាល និង ហ្វឹកហាត់បន្ថែមពី JCI Cambodia ដើម្បីឈានទៅចូលរួមការប្រកួតប្រជែងថ្នាក់តំបន់អាស៊ីប៉ាស៊ីហ្វិក នៅខែមិថុនា ឆ្នាំ ២០១៧ ខាងមុខនេះ ក្នុងប្រទេសម៉ុងហ្គោលីទៀតផង។

អត្ថបទ៖ ចន្ថា