ជិតដល់សង្រ្កាន្តភូមិយើងទៀតហើយ អ្នកបាត់ដំបងត្រៀមខ្លួន

2017-04-07 10:09:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បរិយាកាសនៅក្នុងក្រុងបាត់ដំបងនៅក្នុងអំឡុងពេលមុនថ្ងៃបុណ្យចូលឆ្នាំថ្មីខាងមុខនេះ ប្រាកដជាមានភាពអ៊ូអរនិងសប្បាយរីករាយមិនខុសពីឆ្នាំកន្លងទៅនោះទេដោយសារតែកម្មវិធីសង្ក្រាន្តភូមិយើង ដែលនឹងប្រារព្ធធ្វើម្ដងទៀតនៅក្នុងពេលប៉ុន្មានថ្ងៃខាងមុខនេះ។

កញ្ញាកែម ច័ន្ទបុប្ផា ស្ថាបនិកនៃកម្មវិធីបានអោយដឹងថា កម្មវិធីនៅក្នុងឆ្នាំនេះគឺធ្វើឡើងជាទ្រង់ទ្រាយធំ និងអធិកអធមជាងឆ្នាំមុនដោយប្រារព្ធឡើងរយៈពេលពីរថ្ងៃ គឺ ថ្ងៃទី៨ និង៩ ខែមេសា នៅក្នុងបរិវេណវិទ្យាល័យព្រះមុនីវង្ស។

នៅឆ្នាំដំបូង ព្រឹត្តិការណ៍ខាងលើទទួលបានការចូលរួមយ៉ាងច្រើនហួសពីការរំពឹងទុកពីសំណាក់មិត្តយុវវ័យនៅក្នុងខេត្ត។ នៅលើកទីពីរនេះ កញ្ញាជឿជាក់ថា អ្នកចូលរួមនឹងមានកាន់តែច្រើនកុះករជាងឆ្នាំមុនទៀត។

កញ្ញាបន្ថែមទៀតថា ជាលើកទី២ វិទ្យាល័យព្រះមុនីវង្សនឹងត្រូវរៀបចំអោយទៅជាភូមិដ៏ធំមួយ ដែលមានល្បែងប្រជាប្រិយច្រើនប្រភេទរង់ចាំអ្នកចូលរួមលេង មានការប្រគំតន្ត្រី ការរាំលេង មានតូបតូចៗសម្រាប់លក់ភេសជ្ជៈ និងអាហារជាដើម។ ថវិកាដែលទទួលបានពីកម្មវិធីនឹងត្រូវយកទៅជួយដល់សាលាបឋមសិក្សាមួយកន្លែងដែលមានការខ្វះខាតក្នុងស្រុកថ្មគោល។

មិនតែប៉ុណ្ណោះ ការសម្ដែងជាលក្ខណៈប្រពៃណីជាតិ ក៏នឹងមានវត្តមាននៅក្នុងកម្មវិធីផងដែរ ដែលខាងក្រុមការងារភូមិយើង បានប្រាប់ថា៖ “សុំលាក់ទុកសិន ដើម្បីធ្វើអោយភ្ញាក់ផ្អើល”។

គួររំលឹកថា កម្មវិធីសង្រ្កាន្តភូមិយើង លើកទី១ធ្វើឡើងនៅក្នុងឆ្នាំ២០១៦ មានអ្នកចូលរួមរហូតទៅដល់៥០០០នាក់ ដោយនៅក្នុងគោលបំណង ដើម្បីអបអរសាទរពិធីបុណ្យចូលឆ្នាំថ្មី ជួបជុំមិត្តភ័ក្ដិដើម្បីកម្សាន្តសប្បាយមុនពេលបុណ្យចូលឆ្នាំ លើកស្ទួយគាំទ្រវប្បធម៌ ប្រពៃណីជាតិយើង និងគោលដៅមនុស្សធម៌ដើម្បីរៃអង្គាសថវិកា យកទៅជួយដល់សិស្សានុសិស្សដែលមានការខ្វះខាត។