​​​​​ថ្មីៗ​នេះ​វិបសាយ​ Paysa បាន​សិក្សា​លើ​​ការ​ជួល​បុគ្គលិក និង ការ​អូសទាញ​បុគ្គលិក​​​នៃ​ក្រុមហ៊ុន​​បច្ចេកវិទ្យា​ធំៗ​ជា​ច្រើន​ដោយ​ការ​សិក្សា​បង្ហាញ​ថា​​ក្រុមហ៊ុន​ Netflix ជា​ក្រុមហ៊ុន​ហ៊ាន​ចំណាយ​ច្រើន​ជាង​គេ​ដើម្បី​អូស​ទាញ​បុគ្គលិក​ពី​ក្រុមហ៊ុន​ដទៃ។ ក្រៅ​ពី​ Netflix ក៏​មាន​ក្រុមហ៊ុន​ជា​ច្រើន​ទៀត​ដូច​ខាង​ក្រោម៖

១. Netflix នឹង​ផ្ដល់​ប្រាក់​កម្រៃ​ជា​មធ្យម​ដល់​បុគ្គលិក​ដែល​ខ្លួន​អូសទាញ​ពី​ក្រុមហ៊ុន​ដទៃ​ច្រើន​ជាង​ ១៦៧%។ ជា​មធ្យម​​គេ​អាច​រក​ចំណូល​បាន​ ១៣០ ៨១៤ ដុល្លារ​/​ឆ្នាំ​ ប៉ុន្តែ​ពេល​ Netlfix ចង់​ជួល​ពួក​គេ​​ ​ក្រុមហ៊ុន​ហ៊ាន​ឲ្យ​ប្រាក់​ចំណូល​ដល់​ ៣២៩ ១៧៤ ដុល្លារ។

២. ក្រុមហ៊ុន​ Wikia ជា​វិបសាយ​បង្ហោះ​មាតិការ​កម្សាន្ត​មួយ​​ហ៊ាន​​ឲ្យ​ប្រាក់​ចំណូល​លើស​ក្រុមហ៊ុន​​គូ​ប្រជែង​​ជា​មធ្យម​ ៧២%។ បុគ្គលិក​អាច​រក​បាន​​ជា​មធ្យម​ ១២១ ០៦១ ដុល្លារ​នៅ​ការងារ​ចាស់​ ប៉ុន្តែ​ពេល​មក​ធ្វើ​ការ​នៅ​ Wikia ឡើង​ដល់​ ២០៤ ០៧៧ ដុល្លារ។

៣. ក្រុមហ៊ុន​វិបសាយ​ Lending Club ហ៊ាន​​បន្ថែម​ប្រាក់​ចំណូល​លើស​ពី​ការងារ​មុន​​ ៤៨% ដើម្បី​អូស​ទាញ​បុគ្គលិក។ ការងារ​មុន​ដែល​អាច​រក​ចំណូល​បាន​ជា​មធ្យម​ ១២៨ ៤៥៧ ដុល្លារ​ ​ក៏​បាន​កើន​ដល់​ ១៨៣ ៤៦៩ ដុល្លារ​ពេល​​មក​ធ្វើ​ការ​នៅ​ Lending Club។

៤. ដើម្បី​អូស​ទាញ​បុគ្គលិក​ Microsoft ហ៊ាន​​បង្កើន​ចំណូល​ជា​មធ្យម​ ៤៨% លើស​ការងារ​ចាស់​របស់​ពួក​គេ។ បុគ្គលិក​ដែល​ពី​មុន​រក​បាន​ជា​មធ្យម​ ១១៩ ៩៨៣ ដុល្លារ​ ពេល​​ក្លាយ​ជា​បុគ្គលិក​ថ្មី​នៅ​ Microsoft ចំណូល​ក៏​កើន​ដល់​ ១៦៥ ៣៤៨ ដុល្លារ/ឆ្នាំ។

៥. Groupon វិញ​ក៏​ហ៊ាន​​បន្ថែម​ប្រាក់​ចំណូល​ជា​​មធ្យម​ ៣៨% លើស​ការងារ​ចាស់​របស់​បុគ្គលិក។ ពី​មុន​ធ្លាប់​តែ​រក​បាន​ជា​មធ្យម​ ១៣៧ ៣៩០ ដុល្លារ​ ពេល​មក​ធ្វើ​ការ​នៅ​ Groupon ក៏​កើន​ដល់​ ១៧៥ ២៣៣ ដុល្លារ៕​ ​​​​​​​