មូលហេតុអ្វីបានក្រចកដៃអ្នកគគ្រិចម្ល៉េះ?

2017-05-03 03:27:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលខ្លះអ្នកទាំងអស់គិតតែពីការថែសម្រស់មុខ និងរូបរាងកាយ តែក៏ភ្លេចគិតដល់ការថែរក្សាក្រចកដៃ។ ក្រចកដៃមានសារៈសំខាន់មែនទែន ព្រោះយើងម្នាក់ៗធ្វើសកម្មភាពដោយប្រើកាយវិការដៃ ហើយបើក្រចកដៃរបស់អ្នកមានភាពគគ្រិច នាំអោយគេផ្ដល់ចំណាប់អារម្មណ៍មិនសូវល្អមកលើអ្នកផងដែរ។ ដូចនេះចង់ដឹងថាតើមានមូលហេតុអ្វីខ្លះដែលធ្វើអោយក្រចកដៃរបស់អ្នកមិនសូវស្អាត មកអានចំណុចទាំង៥ខាងក្រោមទាំងអស់គ្នា។

១ ការខាំក្រចកដៃ

មនុស្សខ្លះមានទម្លាប់មិនអាក្រក់មួយ ដូចជា ការខាំក្រចកដៃ ដែលធ្វើអោយក្រចកដៃអ្នកមើលទៅមិនស្មើគ្នា ហើយអាចឆ្លងមេរោគចូលតាមមាត់ទៀតផង។ ដើម្បីបំបាត់នូវទម្លាប់មិនល្អនេះ អ្នកអាចសាកលាបក្រចកដៃអោយស្អាតៗ នោះអ្នកនឹងយកចិត្តទុកដាក់លើក្រចក និងមិនសូវខាំដូចមុន ព្រោះខ្លាចខូចថ្នាំក្រចកដ៏ស្អាតនោះ។

២ ការលាងថ្នាំក្រចកដោយការកេះ

ការកេះថ្នាំក្រចកដោយមិនមានទឹកលាង គឺប៉ះពាល់សុខភាពក្រចកខ្លាំងពិតមែន ដោយសារតែពេលកេះនោះ ថ្នាំមិនចេញមកស្អាតទាំងស្រុងដូចពេលមានទឹកលាងក្រចកត្រឹមត្រូវនោះទេ ហើយវាធ្វើឲ្យស្រទាប់ក្រចកខាងលើរបស់អ្នករបកទៀតផង។

៣ បរិភោគអាហារដែលមិនល្អ

នៅពេលដែលអ្នកបរិភោគអាហារដែលគ្មានជីវជាតិ ឬមិនល្អចំពោះសុខភាព វានឹងបង្ហាញឡើងនៅលើតួខ្លួនរបស់អ្នកដូចជា សក់ ស្បែក និងក្រចកនេះឯង។ អ្នកគួរតែញ៉ាំបន្លែបៃតង ឬក៏ផ្លែការ៉ុត ដើម្បីឲ្យក្រចករបស់អ្នកមើលទៅស្អាតគួរអោយទាក់ទាញ។

៤ ការតក្រចក

ការតក្រចកដោយ gel , acrylic ឬក៏បិតក្រចកជ័រពីលើក្ដី គឺសុទ្ធតែផ្តល់ផលប៉ះពាល់មិនល្អដល់ក្រចកដៃរបស់អ្នក ព្រោះវិធីក្នុងការប្រើប្រាស់សុទ្ធតែមានសារធាតុគីមីដែលធ្វើឲ្យក្រចកដៃរបស់អ្នកកាន់តែស្ដើងទៅៗឈានទៅរកការដាច់រហែក។ ហើយម្យ៉ាងវិញទៀតការតក្រចកនេះស្អាតតែពេលតនោះទេ ព្រោះនៅពេលដែលត្រូវបកចេញ គឺត្រូវប្រើទឹកacetone ដែលធ្វើអោយក្រចករបស់អ្នកត្រូវរងដំណំម្ដងទៀត។

៥ ការប្រើក្រចកទៅលើធ្ងន់ៗ

ឧទាហរណ៍នៃការប្រើក្រចកដៃធ្ងន់ៗនោះគឺ ការគាស់ទឹកក្រូច ឬរូតខោ ព្រោះក្រចកងាយនឹងកោងបាក់ពិតមែន ដូច្នេះនៅពេលដែលអ្នកធ្វើកិច្ចការអ្វីក៏ដោយ អ្នកគួរតែប្រាកដថាអ្នកប្រើម្រាមដៃផ្ទាល់ មិនមែនក្រចកដៃនោះទេ។

នៅពេលដែលក្រចកដៃរបស់អ្នកស្អាតនឹងធ្វើឲ្យខ្លួនយើងកាន់តែមានទំនុកចិត្ត និងភាពទាក់ទាញ អញ្ចឹងមានទៅខាតបង់អ្វី គ្រាន់តែយើងមកថែក្រចកដៃឱ្យបានស្អាតខ្ញង់នោះ!

អត្ថបទ៖ ដាលីន