ផ្សាររទេះ K63 កន្លែងញ៉ាំអីថ្មីនៅភ្នំពេញ ល្បីថាប្លែកមានអាហារគ្រប់មុខសុទ្ធតែឆ្ងាញ់ៗ

2017-11-17 02:52:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែបើកដំណើរការបានជាង១ខែ K63អាហារដ្ឋានរទេះ ឫផ្សាររទេះជាកន្លែងប្រមូលផ្ដុំអាហារឆ្ងាញ់ៗគ្រប់មុខថ្មីទៀតហើយនៅភ្នំពេញ និងកំពុងមានការចាប់អារម្មណ៍ខ្លាំងពីយុវវ័យទៅញ៉ាំពេញៗរកកន្លែងអង្គុយសឹងតែមិនបាន។

បើតាមអ្នកស្រី លី ពៅ ជាអាជីវករជួលរទេះលក់នៅក្នុងផ្សារនេះ ប្រាប់ Sabay ថានៅទីនេះមានលក់របស់ញ៉ាំគ្រប់ប្រភេទសុទ្ធឆ្ងាញ់ៗ និងតម្លៃសមរម្យ។ ដូច្នេះអ្នកចូលចិត្តញ៉ាំអីថ្ងៃចុងសប្ដាហ៍ ឫចេញពីធ្វើការ អាចមករកអីញ៉ាំបាននៅកន្លែងតែមួយមានអាហារគ្រប់មុខតែម្ដង។ អ្នកលក់គុយទាវរូបនេះប្រាប់ថា របស់ញ៉ាំគ្រប់មុខត្រូវដាក់លក់ជារទេះ មានដូចជា៖ គុយទាវ មីស៊ុប មីខគោ សាច់អាំងគ្រប់មុខ ប្រហិត គាវបំពងស្រួយៗ បាយឆា មីឆា គ្រឿងសមុទ្រគ្រប់មុខ នំបញ្ចុក រួមទាំងបង្អែម និងភេសជ្ជៈគ្រប់មុខ។ល។

ចំពោះតម្លៃវិញក៏មិនខុសពីនៅខាងក្រៅដែរ បើទោះជាទីនោះទើបតែបើកថ្មី និងមានលក្ខណៈប្លែកពីគេយ៉ាងណាក៏ដោយ។ ផ្សាររទេះនេះ មានរទេះសរុបរហូតទៅដល់ជាង ៣០ឯណោះ និងមានការតុបតែងលម្អមានភាពទាក់ទាញប្លែកៗពីគ្នាទៀតផង។

ដូចនេះបើប្រិយមិត្តយុវវ័យចង់ផ្លាស់ប្ដូរបរិយាកាស និងចង់ភ្លក់រសជាតិអាហារជាច្រើនមុខនៅទីនោះអាចទៅសាកល្បងបាន ចាប់ផ្ដើមបើកលក់ពីម៉ោង១០ព្រឹក រហូតដល់ម៉ោង ១០យប់។ រីឯទីតាំងវិញក៏មិនពិបាករកដែរ គឺស្ថិតនៅតាមបណ្ដោយផ្លូវ ២១៤ កែងផ្លូវ៦៣ ជិត (ACE សម្ដេចប៉ាន)៕