ថ្ងៃ​នេះ Sabay នឹង​លើក​យក​ព័ត៌មាន​ខ្លះៗ​ពី Resort ដ៏​ពិសេស​មួយ​ក្នុង​ចំណោម Resort ជាច្រើន​នៃ​កោះ​ម៉ាល់ឌីវ ដោយ​ស្ថិតនៅ​តំបន់​ត្រូពិក​មហាសមុទ្រ​ឥណ្ឌា ដែល​មាន​ឆ្នេរ ក៏​ដូចជា​ទេសភាព​ស្អាតៗ​ព្រម​ទាំង​ជា​កន្លែង​មនុស្ស​ជាច្រើន​ប្រាថ្នា​ចង់​ទៅ ពិសេស​អ្នក​ទើប​រៀបការ​រួច។

Finolhu Villas ជា Resort ផ្កាយ​៥ របស់​ក្រុមហ៊ុន Club Med បង្កើត​លើ​កោះ​ម៉ាល់ឌីវ ដោយ​ក្នុង​នោះ​បែងចែក​ជា ២​ប្រភេទ ផ្ទះ​លើទឹក និង​ផ្ទះ​លើ​ឆ្នេរ ដែល​ក្រៅពី​របស់​ប្រើប្រាស់​ទំនើបៗ និង​ការ​រៀបចំ​ដ៏​ទាក់ទាញ ព្រម​ទាំង​អ្នក​ប្រចាំ​ការ​ម្នាក់ ផ្ទះ​នីមួយៗ​ក៏​មាន​អាង​ហែល​ទឹក​ដាច់​ដោយ​ឡែក​ផង​ដែរ។

លោក Khun Ronnaphop NOPSUWAN ប្រធាន​ផ្នែក​លក់ Club Med បាន​និយាយ​ក្នុង​ពិធី​ជួប​ជុំ​ក្រុមហ៊ុន​ទេសចរណ៍​កម្ពុជា​ថា៖ "ពេល​អ្នក​បង់​លុយ អ្នក​នឹង​ទទួល​បាន​សេវាកម្ម​ជា​កញ្ចប់ ទាំង​ការ​កម្សាន្ត​គ្រប់​ប្រភេទ ម្ហូប​អាហារ​សម្រាប់​ភ្ញៀវ​គ្រប់​តំបន់ ភេសជ្ជៈ និង​សេវា​ជាច្រើន​ទៀត ដែល​នេះ​ជា​ចំណុច​ខុសប្លែក​របស់ Finolhu Villas បើ​ធៀប​ទៅ​នឹង Resort ដទៃ​នៅ​ម៉ាល់ឌីវ ដោយ​មិន​មាន​កម្មវិធី​កម្សាន្ត​ច្រើន និង​ផ្ដល់​តាម​អ្វី​អ្នក​ស្នាក់​នៅ​ចង់​បាន​ឡើយ"។

អ្វី​ដែល​ពិសេស​នោះ​គឺ​ប្រភេទ​ផ្ទះ​សម្រាប់​មើល​ថ្ងៃ​លិច និង​ថ្ងៃ​រះ​របស់ Finolhu Villas ដែល​ជា​កន្លែង​ស្ងប់ស្ងាត់ និង​ដាច់​ពី​គេ​ដទៃ ព្រោះ​រាល់​ការកម្សាន្ត​ទាំងអស់ និង​ធ្វើ​នៅ Kani (Resort ផ្កាយ​៤ របស់ Club Med) ដែល​ធ្វើ​ដំណើរ​ត្រឹម ៥​នាទី​ប៉ុណ្ណោះ​ពី Finolhu Villas ហើយ​អ្នក​ស្នាក់​នៅ Kani មិន​អាច​មក Finolhu បានទេ។

លោក NOPSUWAN បាន​បន្ត​ថា៖ "ភ្ញៀវ​ដែល​មក​ស្នាក់នៅ អាច​កុម្ម៉ង់​តាម​អ្វី​ដែល​គាត់​ចង់បាន ដូចជា​ការ​រៀបចំ​បន្ទប់ ការ​ញ៉ាំ​អាហារ ការ​រៀបចំ​កម្មវិធី​ផ្សេងៗ និង​អ្វី​គ្រប់​យ៉ាង​ដែល​ភ្ញៀវ​ចង់បាន"។

សម្រាប់​អ្នក​ចង់​ទៅ ក៏​អាច​ទិញ​ជា​កញ្ចប់​សេវា​ក្រេប​ទឹក​ឃ្មុំ​ចេញ​ដំណើរ​តែ ២​នាក់​បាន​នៅ​ក្រុមហ៊ុន World Pop និង​ក្រុមហ៊ុន​ទេសចរណ៍​ដៃគូ​ដទៃ​ទៀត ដោយ​មាន​តម្លៃ​ចាប់ពី ១ ១៥០​ដុល្លារ ក្នុង​១​នាក់ ចំពោះការ​ស្នាក់​នៅ​ក្នុង Club Med Kani Resort ២យប់ និង១ ៩០០ដុល្លារ ក្នុង១នាក់ សម្រាប់ Finolhu Villas ២យប់ដូចគ្នា។

Club Med ជា​ក្រុមហ៊ុន​បដិសណ្ឋារកិច្ច​របស់​បារាំង​មួយ​ដ៏​ធំ​លើ​ពិភព​លោក ដោយ​មាន Resort ៧៥​កន្លែង ហើយ​គ្រប់ Resort ទាំងអស់​មាន​ភាព​ខុស​ប្លែក​គេ​ត្រង់ អ្នក​មក​ស្នាក់​នៅ​នឹង​ទទួល​បាន​សេវាកម្ម​គ្រប់​យ៉ាង​ជា​កញ្ចប់ (អាហារ ភេសជ្ជៈ កម្មវិធី​កម្សាន្ត និង​តាម​តម្រូវ​ការ​អ្នក​ស្នាក់​នៅ)៕